Poslovne vesti - Makedonija

Нов тендер за „Чебрен“ и „Галиште“

За дваесетина дена би требало да се објави нов тендер за изградба на хидроелектраните „Чебрен“ и „Галиште“.

Според вицепремиерот за економски прашања, Владимир Пешевски, проектот повторно ќе се реализира како јавно приватно партнерство и ќе има поголема флексибилност во однос на параметрите на самите електрани.

„Конечен став за тоа кои ќе бидат измените ќе биде донесен на седница на Влада и тие ќе бидат преточени соодветно во тендерската документација“, изјави Пешевски по седницата на Комитетот за стратегиски и инфраструктурни проекти.

Според него, тендерот нема драстично да се разликува од претходниот во однос на концептот. Флексибилност ќе има во однос на висината на браните, со цел идниот концесионер да има можност да ја оптимализира хидроцентралата, како и во однос на поситни технички измени што би довеле до поквалитетно решение.